वडगाव नगरपंचायतीची पहिली निवडणूक २०१८ मध्ये झाली.या निवडणुकीत भारतीय जनता पक्षाच्या चिन्हावर ७ उमेदवार विजयी झाले होते.यावेळी नगरपंचायतीत नगराध्यक्ष पदासह भाजपाचे संख्याबळ दुप्पट करण्याचे उद्दिष्ट पक्षाने ठेवले असून त्यादृष्टीने शहर भाजपाने काम चालू केले आहे. "व्हिजन २०३० जनसंपर्क अभियानात" शहरातील भाजपचे पदाधिकारी व कार्यकर्ते प्रत्येक प्रभागातील प्रत्येक घरात जाणार असून नागरीकांना एका फॉर्मवर प्रश्नावली देणार आहेत.ज्यामध्ये त्यांच्या परीसरातील नागरी सुविधा,नगरपंचायत कार्यालयाच्या सेवा,कर आकारणी, प्रस्तावित विकास आराखडा (DP)याबाबत वस्तूनिष्ठ पर्यायी प्रश्न विचारण्यात आले असून शहराच्या सर्वांगीण विकासासाठी नागरीकांच्या ज्या काही सूचना असतील त्या लिहीण्यासाठी फॉर्ममध्ये जागा ठेवण्यात आली आहे.पंतप्रधान नरेंद्र मोदींच्या पंचाहत्तरव्या वाढदिवशी १७ सप्टेंबर पासून या अभियानाला सुरुवात होईल अशी माहिती भाजपाचे शहराध्यक्ष संभाजी म्हाळसकर यांनी दिली.
या अभियानातून गोळा झालेल्या सूचना, मते आणि अपेक्षा संकलित करून त्याचे विश्लेषण करण्यात येणार आहे. यामधील महत्त्वपूर्ण व रचनात्मक सूचना भाजपाच्या आगामी जाहीरनाम्यात स्थान मिळवतील. नागरिकांच्या थेट सहभागातून तयार होणारा हा जाहीरनामा खऱ्या अर्थाने लोकाभिमुख असेल, असा विश्वास भाजपच्या कार्यकर्त्यानी व्यक्त केला आहे.
वार्ताहर :- समीर भोसले
0 टिप्पण्या